مسافرة مكان بعيد
بعيد وبسيط
الوقت يمر ببطء وكل شي حواليني يذكرني فيك
اخذت عهد على نفسي من اول يوم ركبنا الطيارة اني اعيش حالة الاجازة بكاملها
انسى الديرة والناس اللي فيها
انسى العالم
يمكن انساك
...
الفندق بعيد عن المطار ومعزول شوي
شاليهنا حلو
بس اول ما دخلت تخيلت اني داخلته معاك
في حمام سباحة صغير وحديقة مسورة
خصوصيه جميلة
وجدامنا البحر
هدوء غير طبيعي بكل شي داير مدايري
الا قلبي وعقلي
احس اني في بركان
اسمه انت
...
نطلع خارج نطاق الفندق
اشوف الزراع لاهي بجوز الهند والبابايا
وابعد شوي وحده حاطه جدرها
وتطبخ تحاول تبيع علشان تترزق الله
يمكن وراها عيال واهل يبون المصرف
وعلى مرما النظر اثنين شكلهم بشهر العسل
ما يشوفون احد غير بعضهم كانهم ملكو هاللحظه واحتكروها
للابد
يا بختهم
امر على بياع الورد مو ورد ريجنت بارك
لا
يبيع قلوب فل وياسمين
اشتري واحد حق نفسي
واجتهد في اني انساك
...
ارد الغرفه واشوفه مرتز على الطاولة
احارب في اني اصمد
بس بعد اسبوع افشل
واقرب من المرتز واشغله
اضغط on
واشبك
وبلحظات اتواصل مع العالم
اقلب جرايد اليوم وافتر على البلوقات
واقط تعليقات
واظل متذكرتك
...
حرب بين اوسيتيا وجوجيا
محاوله انقلاب في موريتانيا
ايران معانده
وفي كويتي محجوز عندهم
العراق تتمزق وكل يوم حوادث هنا وهناك
التيار الديني يواصل مهاتراته
الخ
...
غريبه اشلون جهاز صغير
وزنه ما يتعدى الاثنين كيلو
يخليني اتواصل مع العالم كله بضغطة زر
والشخص الوحيد اللي قاعدة ادور عليه
موجود معاي على طول ومو موجود لو اسويله جوجل من اليوم لي باكر
لو اشيك ايميلي 60 مره
الشي الي شبكت عشانه ودورته مالقيته
مع اني لقيت العالم كله
...
مفعوصة
بالي
6 comments:
كلام حلو ومؤثر بس احنا البشر دايما جذي لي نبي الشي ما نلقاه ولي الشي يكون جريب منا ... ما نكون معاه :)
ما اقول غير يا حظه :)
تروحين و تردين بالسلامة
شفييج وقفتي؟؟ ترى مليت و انا كل يوم ادش اجيك !!
ابي بوست يديد بليز :)
انا متشابه معاج بهالعطله
اعتقد فتح الايميلات كل يوم 60 الف مره
انا قد شاركتج فيها هالصيفيه
لاكثر من هدف
لان
الي يبينا عزة النفس تبقيه
والي نبيييه عيه البخت لا يجيبه
فمالله
lwatan-ajmal
شكرا على هذي المشاعر الجميلة
Don Juan
الدون مشكور وما تقصر كاني رديت
ويقولون يا مطول الغيبات يا مكثر الغنايم
εκşĥα5
كاني رديت
وشكور على السؤال
اجار الدين كشمش
صاج القلب وما يريد
سامحوني ادري اني طولت
بس كنت لاهية
امتحانات
وحب
ودراسة
وسفر
وتان
وعلاقات ما تخلص على خير
ما قصرتو
وكاني رديت
برغم التعب والارهاق
Post a Comment